MUGALUR proiektua Ipar Euskal Herriko Garapen Kontseiluak eramaiten du, Nafarroako Cederna-Garalur elkartea eta Euskal Herriko Unibertsitatearekin partaidetzan. 2023-2024 urtearentzat, NAEN euroeskualdearen « Euroeskualdeko hiritartasuna » deialdiaren diru-laguntza jaso zuen. 2024-2025 urtearentzat, proiektuari bigarren atal bat eskainiko da, deialdi berdinaren diruztatzea lortua izanik.
Aurrekari gisa, Garapen Kontseiluak bere lurralde gogoetan, “mugaz-gaindiko” ikuspegia jartzen du zeharkako gai bat bezala. Horrez gain, bi Estatu nazioen arteko mugatik, hots linea mugiezin horretatik, hurbil bizi direnekin solastean, gehienek kontraerran bat ekartzen dute mahai gainera: mugan, kontrola sistematikoa kendu zenetik, Schengen espazioaren sortzearekin, harremanak ttipituz joan direlakoaren sendimendua bada. Nola esplikatu hori? Zer erran nahi ote du “mugaz-gaindikoa” egiteak gaur egun eta zertarako egin nahi ote da? Gauza bera ote da Txingudin “mugaz-gaindikoaren” bizitzea eta Aezkoan edo Santa Grazin? Laster ohartzen da mugaren presentziak eragin oso desberdinak dituela biztanleen arabera, hauen hizkuntza gaitasuna, historia pertsonala edo familiarenak eragin bat dutelarik, bertzeak bertze. MUGALUR proiektua galdera eta ohar hauen inguruan hausnartzeko eta solasguneen antolatzeko sortu da.
Bere xedea da, mugaren konzeptuaren galdezkatzea, mugaldeetako biztanleak, artista sortzaileak, ikerleak eta erakundeetako teknikariak elkartuz. Euskarri eta molde desberdinak erabiliz, mugaren errealitatearen bizipen desberdinak argitan jarri nahi ditu proiektuak, Euskal Herriaren baitan kokatua den mugaren errealitatearen galdezkatzeko. Zer erran nahi ote du muga baten ertzean bizitzeak XXI. mendean Euskaldun bezala? Zein dira euskal mugaldeetan biztanleek dituzten diskurtso, joera, usaia desberdinak? Hauek nola aipatu eta kondatu?
Tailerrak, sorkuntza artistikoak, artikulu zientifikoak, ikus-entzunezkoak, jardunaldiak, argazkiak, mapa subjektibo eta artistikoak… hainbat elementuren bidez, arlo ezberdinetako jendea elkartzea da proiektuaren funtsa. Sortzen diren euskarriak berriz erabiltzen dira, galdera berriak pausatzeko, hausnarketa berriak eramaiteko, lekukotasun berriak biltzeko.
Xehetasun gehiago proiektuaren ekintzei begira laster…
Webgunea eraikitzen ari gira, laster informazio gehiago eskuragarri izanen dituzue hemen...
Kontaktua: @